You'll never walk alone!

Stórtíðindi af elsku köllunum mínum frá Liverpool.

When you walk through a storm
hold your head up high
And don't be afraid of the dark.
At the end of a storm is a golden sky

Nú lítur allt út fyrir að Rafael Benitez muni taka við stjórnartaumunum hjá rauða hernum og er það vel. Að sama skapi virðist það vera ljóst að hann taki jafnvel nokkrar af skærustu stjörnum Valencia með sér.

And the sweet silver song of a lark.
Walk on through the wind,
Walk on through the rain,
Tho' your dreams be tossed and blown.

Það er því morgunljóst að við munum taka á því á næsta tímabili, júnæted, rassenal og hin fyrrverandi stórliðin meiga því fara að vara sig.

Walk on, walk on with hope in your heart
And you'll never walk alone,
You'll never, ever walk alone.
Walk on, walk on with hope in your heart

Mögulegt byrjunarlið næstkomandi ágúst gæti því litið einhvernveginn svona út:

Dudek

Carrager Hyyppia Ayala Riise

Aimar Gerrard Baraja Kewell

Owen Cisse

USSUSUUSSUSUSUSUSUSUUSUS!!!

And you'll never walk alone,
You'll never, ever walk alone.

Kveðja
Snæþór

Halelúja og heyr heyr!

Hvet alla til að lesa þessa grein Jóns nokkurs Einarssonar.

Þessa hér --> Stöðvið þjófinn!

Kveðja
Snæþór

Ömurleiki hins íslenska samtíma

Við lifum á einkennilegum tímum. Tímum þar sem að lýðræðið á undir högg að sækja. Tímum þar sem að þjóðkjörnir aðilar fylgja ekki reglum lýðræðisins. Tímum þar sem að hagur heildarinnar er settur neðar í goggunarröðina heldur en einkahagsmunir fárra manna. Tímum þar sem að siðspilltir stjórnmálamenn nýta sér stöðu sína til að koma höggi á þá aðila sem þeir telja óvini sína já og tímum þar sem að minn fagri flokkur hefur verið dreginn niður í svaðið og mun seint ná fyrri reisn. Sjaldan hafa jafn fáir orðið jafn mörgum til skammar.

Hvað er til ráða?

Ég sé þrjá möguleika í stöðunni.

Nr. 1. Er að segja sig frá öllum pakkanum, skila inn flokksskírteininu og vera fúll á móti. Reyndar má segja að það sé þingliðið sem sé fúllt á móti þjóðinni. Mér hugnast þessi kostur að mörgu leiti. Það myndi allavega koma í veg fyrir allar þær leiðinlegu árásir sem dynja á manni fyrir það eitt að vera framsóknarmaður.

Nr. 2. Vera bara skítsama. Jafnvel að þykjast vera sammála þessari andskotans vitleysu. Ég get eiginlega ekki skrifað meira undir þessum lið þar sem ég á svo fjári erfitt með að vera skítsama.

Nr. 3. Taka á því, halda áfram að starfa innan flokksins. Láta forystuna heyra það og berjast fyrir breytingum innan flokksins. Nóg er allavega til af fólki sem vill veg flokksins sem mestann. Nú er bara tími til að virkja fólkið og breyta því sem breyta þarf.

Ekki veit ég svo gjörla hvaða skref ég tek en reikna þó fastlega með Nr. 3. Mér þykir bara svo hroðalega vænt um þessi samtök.

Kveðja
Snæþór

Nú vantar bara 15 hitt í það þrjúþúsundasta. Sömu verðlaun og venjulega.

Kveðja
Snæþór

Nokkrar örfréttir.

Gérard Houllier hefur verið látinn taka pokann sinn. Tími til kominn og halelúja! Legg til að Ottmar Hitzfeld verði ráðinn í hans stað.

Fjölmiðlafrumvarpið verður að öllum líkindum samþykkt á eftir. Búhú.

Stórleikur verður háður á Ásvöllum í kvöld. Hvet alla til að mæta.

Da Vinci Lykilinn. Ef þið hafið ekki lesið bókina, kaupið hana. Fyrir ykkur sem eruð búin að lesa hana þá eru hérna fjórir linkar sem þið hafið eflaust mikinn áhuga á.

Numero 1 --> Virgin at the rocks.

Numero 2a --> Síðasta kvöldmáltíðin

Numero 2b --> Síðasta kvöldmáltíðin með nöfnum postulanna, einmitt.

Numero 3 --> O lame saint

Numero 4 --> Ég verð bara að bæta þessum link hérna við. Þið vitið hvað ég á við.

Kveðja
Snæþór

Litlir kassar og allir eins.

Jæja, ekki gekk nú vel að uppfæra í Amsterdam, nóg var þó af netkaffihúsunum, net-coffeeshop (athyglisverð blanda)en viljann vantaði til að setjast niður og lýsa þessari borg kæruleysis og frelsis.

Sérstaða Amsterdam er nefnilega sú að þar eru allir eins og þeir vilja sjálfir. Ef mig langar til að fara út að labba í götóttum skræpóttum kjól þá bara geri ég það og enginn veltir því fyrir sér hvað ég sé að pæla. Ekki nema auðvitað túristarnir. Annar stór plús við borgina er sá að þú getur labbað hvert sem þig langar. Gamli miðbærinn er ekki nema kannski 5km*5km þannig að það er stutt til allra átta. Ef maður ætlar svo að fara eitthvað lengra þá er bara að stökkva upp í tramminn og tramma af stað.

Hugleiðing Það slær mann óneytanlega að koma aftur uppá Skiphól (schippol) og líta yfir einsleita hjörð íslendinga, allir eins, við erum eins og í laginu góða ekkert nema litlir kassar og allir eins. Hugleiðingu lýkur.

Í Amsterdam ættu allir að geta fundið eitthvað við sitt hæfi. Matgæðingar finna þar dýrindis veitingahús, best er að þræða þröngar götur og detta inná einhverja snilldina. Listunnendur geta skoðað aragrúa af söfnum, Rembrandt safnið, Van Gogh safnið (þar eru meðal annars sólbómin frægu), Rijksmuseum (m.a. The Nigh Watch eftir Rembrandt, óhemju snilld) og mörg fleiri söfn eins og t.d. Statlijkmuseum sem hefur að geyma nútímalist og blablablablablabla. Unnendur byggingarlistar munu finna hér mikla allskyns snilld. Einmanna karlar og konur geta fundið hér ýmislegt við sitt hæfi en við förum ekki nánar út í það og svo geta auðvitað hinir Frjálshuga fundið hér útrás fyrir frelsið og teygað hampinn á hinum fjölmörgu kaffihúsum borgarinnar.
Lýkur þar með upptalningunni.

Jamms,

ég hef nú svosem litlu við þetta að bæta, jú annars, það mætti ala þetta bölvaða handboltalandslið betur upp, haga sér eins og fermingarstrákar í flugvélinni og reykja svo eins og strompar við útganginn. Þetta unga fólk í dag. Hnuss.

Kveðja,
Snæþór

Amsterdamdamdamdam!

Kæru gestir kuffélagsins, nú er ég að byrja að pakka niður fyrir ferðina miklu. Kaupfélagsstjórinn, Skvísan og Helgan eru að leggja land undir fót og taka stefnuna á land túlipanannannanna.
Líkt og fyrir fyrri ferðir ársins vil ég benda áhugaverðum inbrotsþjófum á það að heimilið er varið með glæsilegri öryggisvörn frá Öryggismiðstöðinni. So behave.
Ég mun gera mitt besta til að rekast inná netkaffihús í borg kaffihúsanna og rita um það sem fyrir augu ber.
Annars vil ég óska Rósinni og El Dorado góðrar ferðar til hennar ammríku og fáið ykkur nú te við höfnina í Boston, mér skylst að það sé svaka partý.

Annars, lifið heil.

Kveðja
Snæþór

Colonel Sanders the Sugar Coated Assault Weapon


Ég tók þetta test áðan. Mjög athyglisverð niðurstaða.

Your penis' name is: Colonel Sanders the Sugar Coated Assault Weapon.
Taktu prófið og tékkaðu á því hvað lilli þinn heitir!
by badasstronaut today!
Created with Rum and Monkey's Name Generator Generator.

Dauðleiður


Jamms, ég verð að segja það að ég er orðinn alveg hreint dauðleiður á þessu fjölmiðlafrumvarpi og framhaldssögunni um Óla grís. Mér sýnist að allir aðilar séu búnir að renna á rassgatið allavega einu sinni.

Davíð Oddson - rann á rassgatið með því að leggja fram þetta frumvarp. Bætti svo um betur þegar hann neitaði að ræða málið við Stöð 2 og fullkomnaði auðvitað pakkann með því að bauna á Óla grís og dóttur hans. Hann er í skítnum langt upp fyrir haus.

Halldór Ásgríms - rann á rassgatið með því að styðja þessa endalausu vitleysu. Lítur reyndar út fyrir að hann gæti hugsanlega náð að klóra í bakkann ef þessar breytingar sem hann er að ræða um fyrir þriðju umræðuna skyldu hugsanlega vera vitrænar.

Steingrímur Joð - rann á rassgatið með því að geta ekki haldið sér saman og haft stjórn á skapi sínu. Hann tók "skítlegt eðli" Óla gríss og pakkaði því saman með "gungu" og "druslu".

Össur Skarpi - rann á rassgatið, já bara eins og venjulega.

Óli grís - rann á rassgatið með því að skokka ekki út til hennar Dorritar sinnar þegar ljóst var að málið yrði nú ekki afgreitt á föstudeginum. Ég er sannfærður um að aumingjans Friðrik fór að væla í messunni því að hann saknaði svo Óla síns.

Ég sjálfur - rann á rassgatið með því að bauna á leiðtoga flokksins hér 20 línum fyrir ofan og gerði þar með útum pólitískann frama minn.

Ussussuss.

Kveðja
Snæþór

Leiðrétting

Ég verð að viðurkenna að pósturinn hér að neðan á ekki alveg við rök að styðjast.

Við karlmennirnir töpuðum, fair and square.

Kveðja
Snæþór

Eurovision, evróvisjón, júgóvisjón, neighboorvision.................!

Frábær keppni, það eina sem skyggði á hana var léleg lög, gleymanlegir textar, hrikalega ljótur gulur kjóll og vælulagið hans Jóns Jóseps Snæbjörnssonar. Svona fyrir utan þessi smáatriði þá var þetta ágætis keppni, held ég. Annars var svo gaman í partýinu að ég man ekki eftir einu einasta lagi. Það er reyndar betra en sumir aðrir partý meðlimir sem muna ekki eftir því að hafa tekið slaginn í stórleiknum "Barátta kynjanna". Það er svosem líka eðlilegt að gleyma svona nokkru þar sem að veikara kynið hafði rangt við og svindlaði út í eitt. Þar fóru nú fremstar í flokki þessar tvær fraukur hér --> Lil miss cheater og Lil miss hefur rangt fyrir sér <-- Ljótt þegar fólk leiðist út í óheiðarleika en svona er það bara, sumir eru fæddir svindlarar.

Best að hafa ekki fleiri orð um þetta góða teiti.

Kveðja
Snæþór

SKANDALL!!

Það hefur átt sér stað bloggfall.

Jesús góður.

Kveðja
Snæþór

Stórfrétt!

Nú er allt að fara í hundana. MBL.is slær upp á forsíðu sinni frétt sum láta jörðina skjálfa, olíuverð fjúka upp úr öllu valdi, fiskinn í sjónum hverfa og Ómar vaxa hár.

VINDHVIÐA SVIPTI HATTINUM AF DONALDSON!

Þetta er sláandi.

Þetta er á forsíðu á meðan VÍS boðar byltingu í heilbrigðismálum og ekki eitt orð um það!

Sláandi.

Kveðja
Snæþór

Valdabarátta!

Sjaldan eða aldrei hefur önnur eins barátta átt sér stað millum embætta forseta og forsætisráðherra og einmitt nú. Fyrir nokkrum mánuðum síðan hótaði Davíð að leggja niður embætti forseta og fékk til liðs við sig allt sitt fótgöngu, riddara, og stórskotalið.
Núna sér Óli sér leik á borði. Hann getur og mun jafnvel sprengja upp ríkisstjórnina, og þarf ekki einu sinni pennastrik til. Ekki nema kannski eitt stórt NEI ég mótmæli allur! Kíkjum aðeins á hvað gerist ef hann segir nei.

1. Hann missir af brylluppinu.
Afleiðing: Dorrit verður fúl og hann fær ekki neitt næstu vikur.

2. Lögin taka gildi.
Afleiðing: Breytir engu, helstu þættir frumvarpsins taka ekki gildi fyrr en 2006.

3. Boða verður til kosninga.
Afleiðing: Nú auðvitað, annað hvort segir þjóðin já, nú eða nei.

4. Þjóðin segir já.
Afleiðing: Dabbi verður glaður, Dóri verður forsætisráðherra.

5. Þjóðin segir nei.
Afleiðing: Dabbi verður fúll, ríkisstjórnin springur, Dóri verður ekki forsætisráðherra.

6. Dóri verður ekki forsætisráðherra.
Afleiðing: Þjóðin stefnir hratt og örugglega í glötun.

Þetta var svona í fáum orðum það sem getur/mun/kannski gerst á næstu dögum. Gaman að þessu eða þannig.

Tek það fram að ég er ennþá á móti frumvarpinu og tel að þakið ætti að vera 20-25% og ekkert þak á veltu markaðsráðandi fyrirtækis.

Kveðja
Snæþór

Úrvals fluga dagsins er þessi --> Take it away Bill!

Kveðja
Snæþór

Fáránleiki samtímans.


Í erli dagsins eigum við það til að fá í höfuðið hinar fáránlegustu flugur. Flestir hlæja að sjálfum að ígrunduðu máli en aðrið ganga alla leið, skrifa skýrslur og gera sem mest úr sjálfum sér. Hér á eftir koma nokkrar fáránlegar flugur.

1. Jarðgöng til Vestmannaeyja.
Jájá, ég er landsbyggðarmaður og potari en þrátt fyrir það þá finnst mér hér komin fram hugmynd sem eigi best heima í brandarabankanum. Hvernig á að vera hægt að réttlæta framkvæmd uppá 30 milljarða króna. Áætluð umferð um göngin eru 540 bílar á dag sem þýðir að þriðju hverja mínútu myndi bíll keyra inní göngin.

2. Fjölmiðlafrumvarpið.
Til nánari útskýringar bendi ég á pistil um málefnið hér aðeins neðar á síðunni.

3. Ísland á EM, HM eða bara M&M
Ég meina, hvaða séns eigum við þessi 290.000 manna og kvenna þjóð á að komast í keppni hinna bestu í vinsælustu íþróttagrein heims? Margar borgir sem eru margfalt stærri en við eiga ekki einu sinni lið í efstu deildum sinna þjóða.
Auðvitað væri það rosalega gaman, en, dream on honey.

4. Þetta lag hérna --> Fáránleg fluga!

Ég hef því miður ekki tíma í meira.

Kveðja
Snæþór

Látum okkur líða vel.

Ég tileinka öllum þeim þennann póst sem þarfnast upplífgunar og yndisauka. Hér er linkur á lag sem er með þeim yndislegustu sem samin hafa verið. --> Sálarfæða <---

Njótum lífsins í sameiningu.

Kveðja
Snæþór

Fjölmiðlafrumvarp og reið rjúpa á Raufarhön.

Mogginn í dag segir frá tveimur misskemmtilegum málum. Byrjum á því skemmtilegra.

Það vildi nefnilega þannig til að reiður rjúpukarri réðst á rúðugler á Raufarhöfn í nótt. Karrinn sá spegilmynd sína og var svona líka sannfærður um að hér væri á ferðinni annar reiður rjúpukarri á Raufarhöfn sem ætlaði svo sannarlega að troða sér inná sitt yfirráða svæði. Vildi bara segja ykkur frá þessu.

Fjölmiðlafrumvarpið, jesús góður hvað þetta er orðin leiðinleg umræða. Frá mínum bæjardyrum séð er þetta mjög einfalt. Davíð og Co (Náskyldur Donald Duck og Co) eru að fara offari, offari gegn fyrirtæki sem hann hefur lengi átt í útistöðum við. Fyrirtæki sem hann hefur reynt að koma í koll áður og knésetja, ég held að það væri réttast fyrir kallinn að skora á Jón Ásgeir í hringinn. Þá gætu þeir bara klárað þetta. Mér finnst kominn tími til að við hættum svona barnalegum árásum, tími til að vera fagleg og látum öryggi og velferð þjóðarinnar ofar eigin persónulegu deilum og dómgreindarskorti. Kannanir hafa sýnt okkur að þjóðin vill ekki þetta frumvarp. Hverjir eru þingmenn og ráðherrar til að taka ákvörðun sem yfir 70% þjóðarinnar er á móti? Hver er það sem gefur þeim slíkt vald? Mitt atkvæði í síðustu kosningum var svo sannarlega ekki veitt til þess að hægt væri að misnota það og misbjóða mér.
Ég segi það hér og nú að ef þetta frumvarp fer í gegn svo til óbreytt þá mun ég íhuga það mjög alvarlega að kveðja hinn pólitíska vettvang. Ekki sem svo að ég hafi verið mikið að flækjast þar, en þó.
Þingmenn, Halldór, Valgerður, Jón og þið öll hin. Þið hafið gert frábæra hluti, frábæra segi ég, þið hafið lyft þjóðinni uppá á stall sem við höfum ekki séð lengi. Þið hafið veitt atvinnulífinu stórkostlega vítamínsprautu, þið hafið gefið austurlandinu mínu líf á nýjann leik. Ekki, og ég endurtek ekki láta persónulegar deilur forsætisráðherra skemma þá ímynd sem þið hafið skapað flokknum. Þið hafið náð frábærum árangri í að umbylta flokknum. Flokknum sem áður var kallaður fjósaflokkurinn er nú orðinn nýr og glansandi og á næstu mánuðum bætist skrautfjöður forsætisráðherra í safnið. Verið sönn ykkar sannfæringu, hreinskilin og umfram allt gefið lýðræðinu séns.

Kveðja
Snæþór

Raunveruleikasjónvarp

Eins og eflaust allir hafa tekið eftir hafa svokallaðir raunveruleikaþættir tröllriðið heimsbyggðinni undanfarin misseri. Margt af þessu efni höfðar til mín en annað alls ekki. Hér að neðan ætla ég að fara yfir nokkra þætti og þar fyrir neðan verður svo skoðanakönnun um málið.

American Idol
Þessir þættir eru nú að ljúka þriðju vertíðinni í ammríku og hafa fengið gríðarlegt áhorf vestra. Ég er einn af mörgun aðdáendum þáttanna og að mínu mati er þetta svona hér um bil eina raunverulega raunveruleikasjónvarpið. Þættirnir búa yfir einhverjum töframætti, töframætti sem getur leitt sigurvegarann inn í ótrúlegt ríkidæmi og velmegun. Svo er Paula líka soldið sæt. Ég mótmæli hinsvegar algjörlega skrifum Rósarinnar varðandi blikk Simons, mín vegna má hann blikka eins og hann vill en líkurnar á því að ég fái í hnén eru álíka og að Dianna DeGarmo sigri í þáttaröðinni.

The Block
Frekar flottir þættir um fjögur pör sem gera upp eina íbúð hvert í fjórbýlishúsi. Ágætis þættir, spurning um að slaufa Völu matt og taka upp svona í staðinn, það fær allavega mitt atkvæði. Það eina sem böggar mig varðandi þessa þætti er þessi leiðinda Ástrala snobb hroki sem tvö pörin búa yfir. hrollur.

The Bachelor
Funny Bob er genginn út og fékk í verðlaun hina íðilfögru Estellu. Lucky Bastard. Þessir þættir eru löngu útbrunnir og gera útá of mikinn sársauka fyrir minn smekk. Allt snýst um að fleka aumingja saklausa Bob sem svo í staðinn fær að losa um sadiskar kenndir sínar með því að senda heim skælandi ástsjúkar vergjarnar ammrískar stelpuskjátur. Ekki aðdáandi.

The Survivor
Ágætis þættir. Hafa að mínu mati lifað ótrúlega lengi og er það sennilega að miklu leiti þáttastjórnandanum að þakka, ég man reyndar ekki hvað hann heitir en það skiptir víst ekki öllu. Nú stendur yfir serían Survivor All star og hefur minn maður Rupert haldið velli enn sem komið er. Þetta eru góðir þættir þar sem að virkilega reynir á sál og líkama. Oft reyndar aðeins um of á sálina en þarna sjáum við kannski að kraftur snerpa og úthald eru ekki allt og að sama skapi að bókvitið verði ekki í askana látið.

The amazing race
Mitt uppáhald. Frábær skemmtun þar sem að tveggja manna lið æða um hnöttinn í leit að vísbendingum og endamarkinu sem inniheldur milljón dollarakall. Hér reynir á allt, útsjónarsemi, úthald, snerpu og kraft. Helsta ástæðan fyrir því að ég hef gaman af þessum þáttum er samt sennilega sú að þarna sér maður allskonar útkima heimsins sem maður vissi ekki einu sinni að væri til.

Joe Millionaire
Ömurlegur frá upphafi til enda.

Margir aðrir þættir eru á skjánum þessa dagana svo sem The Apprentice, Fear Factor og fleiri. Ég hef ekki sett mig inní þá þætti svo að ekki verður rætt frekar um þá.
Í heildina séð eru þessir þættir ágætis skemmtun, þeir verða hinsvegar oft leiðigjarnir og einhæfir. Margir hafa þá skoðun að þessi tegund sjónvarps sé lægsti punktur siðferðiskenndar mannkynssögunnar, ég er ósammála því. Þessir þættir eru einfaldlega eðlileg þróun og það sem meira er þeir gefa venjulegu fólki möguleika á að rísa úr öskustónni og sýna sig á skjánum.





Kveðja
Snæþór

La Toya La Toya La Toya!




Ég hef ekkert meira að segja. Hún er bara lang best.

Kveðja
Snæþór

Ísbíltúúúr!!

Hvað er betra en ísbíltúr, ekki neitt. Ég hvet alla til að fagna batnandi hitastigi og skella sér út í ísbíltúr í hádeginu.
Ísklúbbur VÍS er reyndar ekki fullskipaður í dag en þpænþku námþesþdurinn verður bara að bíta í það súra og ósæta epli að þitja heima. A la casa.

Kveðja
Þnæþóð

Útkall þriðjudagsins fór fyrir ofan garð og neðan.

Ekki náðist í 2000 hittið þá en nú er það að gerast. Þegar þetta er skrifað vantar ekki nema 30 hitt uppá sem þýðir að takmarkið ætti að nást um 4 leitið í dag.

Ég segi það og skrifa að vegleg verðlaun verða veitt fyrir screenshot af 2000 hittinu. STÓRT KNÚS!!!!

Kveðja
Snæþór

Svona eiga menn að vera, láta bara allt flakka.



Þetta kemur næst Eiður, þú ert bestur!

Kveðja
Snæþór

Pereat!

Í fyrndinni söfnuðust nemendur Lærða skólans í Reykjavík saman og hrópuðu Pereat Sveinbjörn Egilsson. Nú er kominn tími til að við Íslendingar safnist saman á Austurvelli og hrópum öll einum róm Pereat Björn Bjarnason. Eins sorglegt og það kann að hljóma þá verður það að viðurkennast að blessaður maðurinn veldur ekki starfi sínu. Hann er úrvals dæmi um gjörspilltann stjórnmálamann sem er búinn að sitja allt of lengi á stóli. Pereat! Það er reyndar með ólíkindum að hann skuli sitja á þessum stól. Hann stökk jú úr stóli menntamála fyrir nokkrum misserum eins og riddari á hvítum hesti til bjargar borginni, en þegar kosningum lauk sá múgurinn að riddarinn var ekkert nema fuglahræða og hesturinn illa taminn shetlandspony, slík var björgunin. Já það er með ólíkindum hvernig íhaldsmenn landsins tóku fuglahræðuna og dustuðu af henni rykið og smelltu henni upp á hanabjálka í ráðuneyti dóms og kirkju. Þar dinglast hún og gerir margann óskunda. Pereat! Já Pereat! Nú er kallað eftir höfði Björns, eins og allir vita vildi hann ekki ráða konu í stól hæstaréttardómara og valdi frekar evrópusérfræðinginn frænda Davíðs. Þessi ákvörðun hefur nú dregið dilk á eftir sér, Björn búinn að fá í hausinn tvö ljót álit, kannski þessi ákvörðun Bjarnar hafi verið bjarnargreiði, bjarnargreiði gagnvart Birni sjálfum. Pereat!
Reyndar má segja að þessi ákvörðun Bjarnar um hæstarétt skipti ekki öllu máli því að hann átti í raun að vera búinn að segja af sér af annarri ástæðu. Já, í þættinum maður á mann á skjá einum á sunnudaginn sat sjálfur dómsmálaráðherra keikur í aftursæti ráðherrabíls síns. BÍLBELTISLAUS!!!

PEREAT BJÖRN BJARNASON!

Kveðja
Snæþór

Hverskonar er þetta!

Dóttir mín er að syngja lag sem hún lærði í leikskólanum. Hverskonar uppeldi er á börnunum okkar. Lagið hljómar svona.

Ó mamma gef mér rós í hárið á mér.
Því tveir litlir strákar eru skotnir í mér.
Annar er blindur og hinn ekki sér.
Ó mamma gef mér rós í hárið á mér.

Þegiðu stelpa, þú færð enga rós,
farðu heldur með henni Gunnu út í fjós.
Þar eru kálfar og þar eru kýr,
þar eru fötur til að mjólka í.

Ég verð bara að viðurkenna að ég fer hjá mér þegar hún brýnir upp raust sína inná miðjum mjólkurkæli í Hagkaup og syngur svona texta. Kannski er það bara ég sem get skilið textann á þennan máta en þar sem ég er rétttrúaður sakleysingi þá hljóta aðrir að skilja þennann texta á jafnvel verri máta en ég. Guð hjálpi þeim.

Annars, það er Daloon dagur í dag. Ofninn orðinn heitur.

Kveðja
Snæþór

Allir í bátana!

Eins og sjá má á teljaranum hér upp í hægra horni kaupfélagsins, (bak við vefnaðarvöruna), er fjöldi gesta kaupfélagsins að skríða í 2000!! Já 2000 segi ég! Nú er stefnan að ná því takmarki í dag! Ég hvet alla til að senda fjöldapósta, spammaila, msn skilaboð eða hvað sem til þarf, jafnvel gamli sveitasíminn er inní myndinni, látið fólk vita af brunaútsölu í Kaupfélaginu, ljúgið, prettið, svíkið. Allir inná kaupfélagið!

Kveðja
Snæþór

Skilaboð.

Ég hef verið að velta fyrir mér skilaboðum. Öll sendum við frá okkur skilaboð, stundum óafvitandi en oftast þó með fullri vitund. Ég er einn af þeim sem læt heimskuleg skilaboð fara í taugarnar á mér. Dæmi um slíkt er þegar ég sé börn og unglinga í buxum sem á stendur stórum stöfum .:Mein kampf:. eða .:Das Kapital:.. Ég á í það minnsta mjög erfitt með að skilja hver tilgangur 13 ára barna sé með því að auglýsa slíka texta. Allavega hafði ég lítið vit á frægustu bókum öfgamanna til hægri og vinstri þegar ég var í áttunda bekk. Hvað þá þá þekkingu og sannfæringarkraft sem til þarf til að geta varið þær skoðanir og vænti ég álit á heimspólitík sem slíkar yfirlísingar hljóta að kalla á.
Önnur yfirlísing sem ég á erfitt með að skilja eru hinir að því er virðist ódauðlegu CHE bolir, það mætti halda að sumir trúi því að Kúba sé himnaríki á jörð. Já, það er sennilega ástæðan fyrir því að ég og skólafélagar mínir vorum beðin um að safna gömlum blýöntum og strokleðrum hér í gamla daga til að senda til Kúbu.
Nú ætla ég ekki að tala niðrandi orðum um þessa meistara öfganna, Hitler, Marx og Che Guevara, þeir höfðu sínar skoðanir og ég hef mína. Margir aðhyllast kannski skoðanir þessara manna og því er það þeirra mál að rökstyðja þær eða lifa eftir þeim. Hvet ég þó engann til að gera slíkt.
Svona vill þetta fara, pistillinn hefst á hugleiðingu um skilaboð en villist svo út í ádeilu á öfga. Kannski það sé bara ég sem þarf að passa mig á því hvaða skilaboð ég sendi frá mér.

Kveðja
Snæþór

Hvers virði er allt sem þú átt?

Þessi gullna spurning flaug í gegnum huga minn nú í kvöld. Hver einstaklingur getur gengið út frá einu en það er sjálfið. Sjálfið fylgir þér hvert sem þú ferð og þú einn getur lagt verðmat á það. Fyrir mér í það minnsta er sjálfið einungis brot af öllu því sem ég á.
Ég hef orðið þeirrar gæfu aðnjótandi að eignast meira. Ég á fjölskyldu, konu og dóttur sem eru meira margfalt meira virði en allt mitt sjálf. Ég á líka stórkostlega vini, bæði af kyni kvenna og karla. Slík verðmæti er ekki hægt að merkja með krónum og aurum. Í asa hversdagsins vill það brenna við að við gleymum virði vináttunnar, að við setjum okkur sjálf ofar öðru, að sjálfið taki völdin. Gleymum ekki náunganum, fjölskyldunni og vinunum, ræktum sambönd og lifum lífinu.

Þessi hugvekja var í boði kaupfélagsins.

Kveðja
Snæþór

Áður en lengra er haldið vil ég biðjast afsökunar á póstinum hér fyrir neðan.

Kveðja
Snæþór

Ör-saga

Það var eins og vindurinn hefði farið í frí. Fjöllin sem áður voru hvít voru nú flekkótt, svoldið svona eins og Skjalda í sveitinni, Skjalda gamla það er að segja, ekki Skjalda nýja, hún var nú meiri skepnan. Lognið lék við hvern sinn fingur og skuggarnir sem um haustið höfðu lengst með hverjum deginum voru nú styttri, já styttri í dag en í gær. Allt það sem ég hafði hugsað um daginn áður virtist hafa orðið, ég bað um bjartann dag og fuglasöng og svona við fyrstu sýn hafði mér orðið að ósk minni. Ég hef alltaf verið náttúrubarn, hljóð náttúrunnar hafa alltaf veitt mér innblástur og unað, allt frá ópum sjávarins til þytsins í fjalldrapanum upp á heiði. Dagurinn í dag virtist því vera fullkomnlega tilvalinn til þess að láta verða að því, tilvalinn til að ganga út og taka á móti vorinu, láta hendur standa fram úr ermum og taka á því. Stinga upp beð fyrir grænmetið, lagfæra hleðsluna í skjólgerðinu og ganga á fjallið.

Kveðja
Snæþór