Sæl öll,

langt síðan síðast.

Ég hef verið að horfa á ólympíuleikanna, skemmtilegt sjónvarpsefni. Gef þó lítið út á ýmsar greinar þar eins og t.d. trampólín og samhæfða vatnafimleika, já og heldrimanna fimmtarþraut sem inniheldur, ríðingar, sund, hlaup, skotfimi og pick up línur.
Það er eitt sem hefur slegið mig varðandi leikana, það reyndar hefur ekkert að gera með leikana sjálfa en það eru auglýsingar sem eru sýndar fyrir, eftir og á milli þátta. Já, þessar auglýsingar koma frá hinu merka íslenska fyrirtæki Actavis. Í auglýsingunum má sjá íþróttamenn í ýmsum greinum, t.d. handbolta, kringlu o.fl. Það sem slær mig er það að í stað handbolta eru íþróttamennirnir með pillu, í stað kringlunnar eru þeir með pillu! Hvað er í gangi! Er actavis ekki með öllu mjalla. Umræðan síðustu misseri, ár, áratugi hefur snúist talsvert um pilluát íþróttamanna og hvað gera markaðsgeníin hjá Actavis, AUGLÝSA ÞAÐ, ÝTA UNDIR ÁTIÐ!! Ég er sleginn.

Talsvert hafa samflokksmenn mínir já og konur verið í fjölmiðlum að undanförnu, flestir þó ekki af hinu góða. Nokkrir hafa þó staðið sig vonum framar í því að vera vitleysingar, ég nefni engin nöfn. Sá sem mér hefur þó fundist standa sig hvað best er hann Guðni, húrra fyrir honum. Við erum reyndar ekki oft sammála en mér finnst hann hafa staðið sig mjög vel. Krónprinsaklíkan hefur hinsvegar ekki staðið sig vel og geri ég það að tillögu minni að þeir verði settir sem yfirmenn póstburðar í hinum ýmsu sendiráðum um heiminn. Helst í Afganistan, við höfum reyndar ekkert sendiráð þar en við skulum ekkert vera að segja þeim það.

Kveðja
Snæþór

Afsakið

En síðasti póstur á sér afskaplega litla stoð í raunveruleikanum.

Staðreyndin er sú að Kaupfélagsstjórinn stökk yfir Kjöl hér um árið á honum Jobba til að fara á landsþing SUF á Hólum í Hjaltadal. Lá kappanum slíkt á að undan bílnum týndust 2-3 hjólkoppar og eitt dekk endaði ævidaga sína rétt við Hveravelli.

E.s. Jobbi er Toyota Corolla '91.

Kveðja
Snæþór

Óskir!

El Dorado og Rósin fóru upp á hálendið, nánar tiltekið Kjöl, um helgina. Ég óskaði eftir því að þau hefðu auga með hjólkoppum sem ég týndi af bílnum hennar tengdó þarna um árið. Jújú, þau sáu einn hjólkopp út í mýri, en nei, ekki var hann tekinn með þar sem að hraðinn var of mikill. Ég ætla bara að sýna ykkur hvernig fer fyrir fólki sem flýtir sér svo mikið að það geti ekki gert vinum sínum greiða. Sjá þessa mynd hér - El Dorado og Rósin í öllum flýtinum! Þetta minnir mig á hinn góða málshátt:

Betra er flýtinum að fækka en koppinum að farga.

Kveðja
Snæþór

Hvað er ég?

Er ég framsóknarmaður? Ég hef aðeins fengið að heyra þessa spurningu síðustu daga. Ipsens t.d. vildi halda því fram að ég hefði ekki skrifað stakt orð jákvætt um flokkinn þessa 4-5 mánuði sem Kaupfélagið hefur verið á lífi. Ég held reyndar að það sé ekki alveg sannleikanum samkvæmt en þó fer ekki hjá því að ég hafi nokkuð oft argast út í flokkinn á þessum tíma. Ástæðan fyrir því er þó nokkuð ljós, síðustu 4 mánuðir eru sennilega þeir svörtustu í sögu flokksins eða allt frá því að framsóknarmenn börðust fyrir haftastefnunni fyrir margt löngu. Alla vega löngu fyrir minn tíma.
Nú ætla ég botninum sé náð. Héðan í frá renna öll vötn til Dýrafjarðar og við tökum stefnuna á sigur. Við framsóknarmenn höfum átt það til að vinna vel undir pressu og tökum á öllum árum þegar nauðsyn krefur og hún krefur nú. Því miður er ekki hægt að taka til baka þau mistök sem forysta flokksins hefur gert sig sek um síðasta misserið en þau eru að baki, framtíðin er björt.

Það er ekki hægt að segja það sama um íslenska landsliðið í handbolta. Alltaf hef ég hlakkað til þess að kveikja á imbanum og horfa á leik, þar til núna. Ég verð að viðurkenna að ég þjáist/engist um í sófanum yfir þessum ósköpum. Nokkrir leikmenn liðsins virðast vera rétt skriðnir upp í gulu deildina á leikskólanum, geta ekki gripið, geta ekki talið skrefin sín, geta ekki kastað og er algjörlega fyrirmunað að átta sig á því að þeir eigi að reyna að koma í veg fyrir að vondu kallarnir í hinu liðinu eigi helst ekki að koma kringlótta hlutnum í netið.
Ég verð bara að segja að ég skil hann Óla Stef alveg mætavel. Ég myndi ekki nenna að spila með þessum durtum ef ég væri hann.

Að lokum. Ég fór ásamt skvísunni og ráninni á Hereford steikhús í gær. Ágætis staður, get alveg mælt með honum. Sérstaklega ef þið viljið sjá ríka og fræga fólkið. Björgúlfur G. og Jakob Frímann voru á næstu borðum.

Kveðja
Snæþór

Dauði og djöfull!

Enn og aftur sökk flokkurinn minn djúpt í eigin skít í gær. Siv var látin fara. Ég er svona að velta fyrir mér hver gæti hugsanlega verið uppáhalds hljómsveit forystu flokksins, aka krónprinsaklíkan.

1. Suicidal Tendencies - áttu eitt stórgott lag, one hit wonder, sem hét hinu skemmtilega nafni "send me you money". Forysta flokksins virðist vera haldin þessum tendens, á nokkuð háu stigi.

2. Lonely Blue Boys - mjög sennileg ágiskun því að það virðist vera takmark þeirra. Jú, að einangra/fæla sem flesta landsmenn frá stuðningi við flokkinn, þar með yrðu þeir sennilega, jú, lonely.

3. AHA - hópur já-manna í flokknum virðist vera orðinn ótrúlegur, reyndar gerði annar hópur tilraun til að hrekja já-mennina á flótta en þeir sögðu bara, "aha".

4. Megadeath - skýrir sig sjálft, einhver öflin virðast vilja stefna flokknum í einn massa megadeath!


Meira verður það ekki, nöff sed.

Kveðja
Snæþór

Forza Islandia!

Ítalarnir eru mættir til leiks nú verður glatt á vellinum. Ásgeir og Logi voru að tilkynna byrjunarliðið og ég verð bara að segja að það blæs manni nú ekki mikilli von í brjóst. Ég er einhvernveginn ekki frá því að liðið hafi verið sterkara fyrir svona 6-7 árum þegar Gaui stjórnaði þeim með harðri hendi.
Byrjunarliðið er svona:

Markið: Birkir
Vörn: Kristján Örn, Ólafur Örn og Hemmi Hreiðars
Wingbacks: Indriði Sig og Þórður Guðjóns
Miðja: Brynjar Björn, Rúnar Kristins og Gylfi Einars
Sókn: Eiður og Heiðar

Ég hvet alla til að mæta og taka vel á raddböndunum. Þetta eru strákarnir okkar og þeir þurfa á okkar aðstoð að halda!

Koma svo Ísland!

Kveðja
Snæþór

Ýmislegt í gangi!

Hvern djöfulinn er Jón Baldvin Hannibalsson að gaspra um pólitík á Íslandi? Fyrir þá sem ekki vita þá var hann annar tveggja ræðumanna á einhverjum vinstrimanna fundi í kvöld. Fyrir mína parta þá verð ég bara að segja að mér finnst það algjörlega óviðeigandi að starfsmaður í utanríkisþjónustu ríkisins sé að halda slíka fyrirlestra, hvað þá að koma í sjónvarpið og lýsa yfir alls kyns þvælu. Jújú, mikið rétt Finnar hafa staðið sig vel í tæknivæðingu en gleymum því ekki að í Finnlandi er 12-15% atvinnuleysi. Eftir fundi helgarinnar áttaði ég mig nefnilega á því hversu gríðarlega vel ríkisstjórn Íslands hefur staðið sig að flestu leiti, gleymum ekki fjölmiðlamálinu þó. Hér á landi er ekki nema 1,5-4% atvinnuleysi og aðrar þjóðir öfunda okkur í tætlur yfir því. Nonni B. haltu þig á mottunni.

Ég var að koma frá því að spila leik með Melsteðs mönnum. Leikurinn vannst nokkuð auðveldlega 4-2 en mikið andskoti var ég lélegur. Hef þó þá afsökun að mér fannst eins og fæturnir væru að detta undan mér, líkleg ástæða er of lítill svefn um helgina. Tveir læknar eru í liðinu og annar þeirra vildi meina að sjúkdómsgreiningin væri sú að ég væri skidsófrenik en hinn hélt því fram að ég væri haldinn einhverjum sjúkdómi sem hefði áhrif á taugaboð og endaði yfirleitt með blindu. Tek það fram að þeir eru báðir kandidatar, góðir drengir, en létt ruglaðir.

Annað var það ekki, nema jú, á morgun hef ég þjálfun í nýju starfi hjá VÍS, mikið gaman.

Kveðja
Snæþór

Hej och välkomna!

Kære nordiska vænder!

Þetta eru setningar helgarinnar. Kaupfélagsstjórinn dubbaði sig upp í fínu fötin og tók ásamt félögum úr utanríkismálanefnd SUF á móti aðalfundarmönnum og konum frá aðildarsamtökum NCF (nordiska centerungdommens förbund) . Það var mikil gleði, mikið hlegið og talsvert drukkið.......af....hmm..vatni.
Landið klæddi sig heldur betur í fínu fötin og sýndi þessum vinum okkar allar sínu bestu hliðar, takk fyrir það Siggi Stormur og co. Nordisku vendirnir voru enda afskaplega skotnir í landi og lýð og vildu flestir flytja sig um set og setjast að, sérstaklega þó á Þingvöllum. Vænti þess því að sjá nordiska coloníu byggjast upp í kringum Lögberg á næstu árum.
Heldur voru sporin þung á sunnudagsmorguninn eftir gleði næturinnar, ég tek það fram og ræð öllum frá því að skúra eitt stykki veislusal eftir stífa drykkju og þriggja tíma svefn. Jesús góður hvað það er ekki notalegt.
Það eina neikvæða við helgina, fyrir utan þynnkuna, var það að ég lenti í þeirri mjög svo óskemmtilegu lífsreynslu að fá sænskt þjóðlag á heilann og ómaði það stanslaust allan tímann. Til þess að gera lesendum sem mestann grikk hef ég því ákveðið að birta þetta lag hér, þeir sem ekki kunna lagið geta hringt í mig og ég skal kenna það á augabragði, en hér er textinn:


Vem kan segla förutan vind?
Vem kan ro utan åror?
Vem kan skiljas från vännen sin
Utan att fälla tårar?

Jag kan segla förutan vind,
Jag kan ro utan åror.
Men ej skiljas från vännen min
Utan att fälla tårar.

Megi það óma sem lengst!

Víha!

Kærlig hilsen.
Snetor

Veðurblíðan maður uss!

Þið vitið það öll, kannski viðurkennið það ekki en þið vitið það. Ástæðan fyrir blíðunni:

Hvaðan kemur heita loftið? Frá meginlandi Evrópu

Hverjir voru hérna um helgina? Forsætisráðherrar norðurlandanna

Hver tók á móti þeim? Halldór Ásgríms

Hvað er Halldór Ásgríms? Meintur ESB sinni

Hvað ræddi forsætisráðherra Svíþjóðar eftir fundinn? Inngöngu Íslands í ESB

Þetta er auðvitað augljóst mál. Þetta er auðvitað bara forsmekkurinn af því hvernig lífið verður á Íslandi ef við göngum inn.

Kveðja
Snæþór

Daginn, já og þvílíkur dagur!

Sólin er loksins að kreysta útúr sér nokkra skammta af hitabylgjum. Merkilegt að við Íslendingar skulum kalla það hitabylgju það sem suðlægari þjóðir kalla skítakulda.

Já það er mikið um að vera á eftir hjá Kaupfélagsstjóranum. Stórleikur gegn sterku liði TLC í utandeildinni, sennilega kominn tími á stjórann að setja einn, hef ekki enn hitt markið. Eðlilega reyndar, spila auðvitað hægri bak.

Svo er það hún Pink vinkona mín. Það verður stórkostlegt reikna ég með. Við Bleik góum vei bakk, höfum verið í föstu sms sambandi alveg frá því að hún bað mig fyrst um að aðstoða sig við lagasmíðar, yndælis stelpa hún Pink.

Hef svosem fátt að segja nema auðvitað um veðrið hérna í borginni, já, nú er þoka á austurlandi og 27 stiga hiti samkvæmt veðurstofunni á Egilsstöðum en glampandi sól í Reykjavík og 22 gráður. Skil ekki svona hegðun. Já það er löngu tímabært að flytja þessa höfuðborg austur á land. Það er líka miklu fallegra þar.

Pólitík? Já, Dabbi er kominn heim að spítalanum, gott mál. Enn eitt skandalavesenið er að fara að hellast yfir okkur í flokknum. Siv út? Jón út? Árni út? Guðni út? Ég ætla ekki að taka afstöðu til þessa en mér finnst tveir þessara ráðherra eiga það svo sannarlega skilið að vera slaufað út.

Kveðja
Snæþór

Löglegt, en fullkomnlega siðlaust!

Sumir, eru einfaldlega fæddir skíthælar. Það hefur komið fyrir okkur öll að einhver eða einhverjir gera eitthvað á okkar hlut, eitthvað sem er löglegt...en siðlaust.

Óþolandi dæmi um það er t.d. þegar maður er í röð við kassa í Hagkaup t.d. Röðin er löng og maður er búinn að bíða á meðan hver húsmóðirin(faðirinn) á fætur öðrum er búin(n) að tína uppúr kerrunum sínum óteljandi pakkningar af cheerios, rolluhakki og bleyjum. Já röðin er löng og ég búinn að bíða, enn eru þó nokkrir fyrir framan mig og enn fleiri fyrir aftan. Þá er eins og kvikni skyndilega ljós hjá vaktstjóra verslunarinnar sem ákveður að opna næsta kassa við hliðina. "NÆSTI GESSOVEL" segir einhver smáp**an á kassanum og hvað gerist. Einhver sem er nýkominn í röðina stekkur til og treðst fremst í nýju röðina. Óþolandi, já. Löglegt, já. Siðlaust? Algjörlega!

Ástæða þess að ég er að pirra mig í dag er sú að ég lenti í einu svona atviki í morgun. Ég hjólaði auðvitað í vinnuna þar sem að frúin er á bílnum fyrir vestan. Þegar ég er kominn inn í hús með hjólið sé ég hvar einn samstarfsmaður kemur á hjólinu sínu niður stiga, já niður stiga segi ég, þvílíkt og annað eins kæruleysi. :-) Nú ég, verandi sá herramaður sem ég er, bíð auðvitað eftir viðkomandi og hjálpa honum að drösla hjólgarminum inn í húsið. Nú verð ég að benda á það að í húsakinnum VÍS eru tvær sturtur, karla og kvenna. Nú við auðvitað förum upp á næstu hæð með lyftunni, í mesta bróðerni, en þegar við komum að sturtunum tekur kvikindið undir sig stökk og inní karlasturtuna, já það gerði hann með glotti á vör, bölvaður melurinn. Nú ég auðvitað þurfti að bíta í það súra epli að fara í kvennasturtuna og lagði mig þá í stórhættu því hver vill leggja það á sig að verða fyrir barðinu á kviknöktum kvennmanni? Það sem þessi argasti skíthæll og drullusokkur gerði er auðvitað löglegt, en fyllilega siðlaust.

Því hvet ég alla sem eiga leið upp í Breiðholt á bilinu 16:30 - 17:00 og sjá einhversstaðar þurs einn á gömlum hjólgarmi að opna rúðuna og ausa yfir viðkomandi svívirðingum!

Kveðja
Snæþór

Kveðja

Davíð Oddsson forsætisráðherra á við mjög alvarleg veikindi að stríða þessa dagana. Þrátt fyrir að okkur Davíð hafi oft greint á þá er slíkt gleymt við aðstæður sem þessar. Ég óska Davíð sem bestum bata og hlakka innilega til að sjá hann, vonandi fullfrískann, afhenda Halldóri Ásgríms lyklana að stjórnarráðinu í september.

Kveðja
Snæþór

Djö...

Hvað á maður að gera við konu sem skrifar svona um mann...

"Eftir þessa daga hófst svo ferðalagið mikla þar sem við keyrðum í einni bunu til Egilsstaða til að mæta á ættarmót Rauðholtsættarinnar, hinnar miklu gleymsku og utanviðsig ættar. Snæþór kippti svo sannarlega í kynið þegar hann keyrði yfir ferðatöskuna mína og fjallgönguskóna við lítinn fögnuð undirritaðrar. "

...ég bara spyr.

Ég er sannfærður um að það eiga allir sínar stundir. Mínar eru kannski aðeins fleiri en hjá öðrum en þá er bara að hafa gaman að því. Ég meina, hvernig væri nú lífið ef við værum öll fullkomin?

Kveðja
Snæþór

Sumarfrí að kveldi komið.

Já, nú er komið að því. Hið stutta sumarfrí er búið og tími til kominn að takast á við vinnuna á nýjan leik. Fríið var í alla staði alveg hreint ljómandi gott, sól skein oftast í heiði og ég man ekki eftir því að hitamælirinn hafi sýnt lægri tölu en 14 gráður á celsíus sem er auðvitað hið besta mál. Það rennir líka enn frekar stoðum undir það að austur og norðausturland eru yfirburðarlandshlutar þegar kemur að veður sæld, það er bara enginn vafi á því.

Ferðalýsingin fylgir hér á eftir stutt og laggóð. Í heildina voru eknir 3050 kílómetrar, hvorki meira né minna.

Mæðgurnar voru eknar úr hreiðrninu nokkkrum dögum áður en Kaupfélagsstjórinn settist upp í flugvél og flaug á vit ævintýranna vestur á Ísafjörð á föstudagsmorguninn fyrir um 10 dögum síðan. Reyndar var planið að fljúga á fimmtudagskvöldið en vegna óviðráðanlegra orsaka og hreinnar heimsku undirritaðs var vélin flogin þegar mætt var á völlinn.
En jæja, það var því flogið á föstudagsmorgunn og svo ekið af stað að vestan um hádegisbil. Ferðasagan er svo svona.

Föstudagur - Ísafjörður .. Egilsstaðir
Laugardagur - Egilsstaðir .. Hjaltalundur (ættarmót Rauðholtsættarinanr stórmerku)
Sunnudagur - Hjaltalundur .. Kárahnjúkar .. Randaberg
Mánudagur - Randaberg .. Seyðisfjörður .. Skipalækur
Þriðjudagur - Skipalækur .. Skriðuklaustur .. Möðrudalur
Miðvikudagur - Möðrudalur .. Dettifoss .. Ásbyrgi
Fimmtudagur - Ásbyrgi .. Akureyri .. Húsavík
Föstudagur - Húsavík .. Akureyri .. Sauðárkrókur
Laugardagur - Sauðárkrókur .. Akureyri .. Sauðárkrókur
Sunnudagur - Sauðárkrókur .. Reykjavík

Nenni ekki að útskýra þetta neitt frekar en vill þakka öllum þeim sem við hittum, Rauðholtsslektinu, Kalla og Unni fyrir afbragðs gistingu á hinni fögru en rykugu Húsavík (og afbragðs pitsum), Önnu og Dóra fyrir ágætis drykkju samsæti og svo öllum hinum.

Kveðja

Snæþór